“Në emër të popullit të Kosovës” nuk u përjetua si drejtësi

Kur transmetimi në ekranin e madh përfundoi, shumica e njerëzve u kthyen dhe u nisën drejt sheshit “Nënë Tereza” në Prishtinë, me kokat dhe flamujt e ulur, sikur ishin mposhtur tërësisht. Më vonë atë mbrëmje, disa protestues, të cilët nuk e përmbajtën dot mllefin, u mblodhën para zyrave të EULEX, duke hedhur gurë dhe gjësende në drejtim të ndërtesës, ndërsa mjetet piroteknike bënë që një pjesë e vogël e çatisë të merrte flakë; të tjerë bllokuan rrugën në njërën nga hyrjet e Prishtinës. Turma të protestuesve u mblodhën edhe para ndërtesës së qeverisë, ku disa pjesëmarrës u përpoqën t’i ndalonin protestuesit me maska dhe diskutuan se çka do të nënkuptonte, në një situatë të tillë, t’i dilje kundër qeverisë ose policisë.

Në fund të fundit, kjo gjykatë ishte votuar nga Kuvendi i Kosovës dhe ndodhej në Hagë. Si Dhomat e Specializuara të Kosovës, ashtu edhe Zyra e Prokurorit të Specializuar janë pjesë e sistemit gjyqësor të Kosovës, por veprojnë në Hagë me gjykatës, prokurorë dhe staf ndërkombëtar. Këto protesta që pasuan mund të shihen si përpjekje për ta rimarrë një pjesë të kontrollit pas një dite tejet emocionale. Por aktgjykimi mbetet. 

Dhe protestat nuk përfunduan atë ditë.